संगमेश्वर / मकरंद सुर्वे:-एका महिलेला भातगाव येथील पुलावर फिरण्यासाठी घेऊन गेलेल्या नराधमाने दागिने काढून घेत भातगाव पुलावरून ढकलून दिल्याची घटना २१ ऑक्टोबर रोजी घडली होती. याप्रकरणी महिलेने संगमेश्वर पोलीस ठाण्यात दिलेल्या फिर्यादीवरून पोलिसांनी संशयित आरोपी आरोपी नितीन गणपत जोशी ( २७, मुळ रा. मधलीवाडी, पाचेरीसडा, ता. गुहागर, सद्या प्रगतीनगर, नालासोपारा, ) याला मुंबई येथून अटक करण्यात आली आहे.
नितीन याने मुळ गावी काम असल्याचे तेथे जायचे आहे असे सांगितल्याने त्या महिलेला सांगितले. दोघेही सोन्या चांदीचे दागिने, वापरते दोन मोबाईल व तिच्या भावाने तिच्याकडे ठेवलेली अॅक्टीवा गाडी असे सोबत घेवून आरोपीसह नालासोपारा येथुन दिनांक २१/१०/२०२४ रोजी २०.०० वा.चे सुमारास ट्रॅव्हल्सने निघाले ते दि. २२/१०/२०२४ रोजी ०६.०० वा. चे सुमारास गुहागर परिसरात आले. तेथे नितीन याने तिला एका हॉटेलमध्ये राहण्याची व्यवस्था केली. तो त्याचे घरी निघुन गेला. त्यानंतर दि. २२/१०/२०२४ रोजी १७.०० वा. चे सुमारास आरोपी याने त्या हॉटेलवर जावून तिला सांगितले माझा मित्र भातगाव ब्रीज येथे भेटायला येणार आहे असे सांगून आपण त्याला भेटुन नालासोपारा येथे परत जाऊ असे सांगितले. त्यानंतर आरोपी हा फिर्यादी यांना अॅक्टीव्हा गाडीने भातगाव ब्रीज येथे घेवुन गेला. तेथे सायंकाळी 6 वा. चे सुमारास नितीन याने ती बेसावध असताना त्यांना दोन्ही हाताने उचलुन ठार मारण्याच्या उद्देशाने भातगाव पुलाच्या कठड्यावरुन खाली पाण्यामध्ये टाकले व तीच्याकडील सोने, चांदीचे दागिने असलेली पर्स, मोबाईल व अॅक्टीवा मोटारसायकलसह चोरुन घेवुन निघून गेला. याबाबतची फिर्याद त्या महिलेने संगमेश्वर पोलीस ठाण्यात दिली. त्यानुसार पोलिसांनी भा.न्या.सं.२०२३ कलम १०९ (१). ३०९ (६) प्रमाणे गुन्हा दाखल केला.
सदरचा गुन्हा हा महिलाविषयक गंभीर असल्याने मा. वरिष्ठांच्या मार्गदर्शनाखाली पोनि/श्री. यादव यांनी पोहेकॉ/१४३० कामेरकर, पोहेकॉ/१२७३ मनवल, पोकॉ/१३५६ मस्कर यांचे तपास पथक आरोपीचे शोधास रवाना केले. आरोपी नितीन गणपत जोशी याचा शोध घेत असताना तुळीज पोलीस ठाणे, नालासोपारा येथे सापळा रचून आरोपी नितीन याला ताब्यात घेवून चौकशी केली असता त्याने महिलेचे सोन्या चांदीचे दागिने, दोन मोबाईल व अॅक्टीवा गाडी चोरल्याचे कबुली दिली. म्हणून त्यास शनिवारी पोउनि/नागरगोजे यांनी अटक करून त्याचेकडे अधिक चौकशी केली असता आरोपी याचे ताब्यातून चोरीस गेलेले सोन्या चांदीचे दागिने, वापरते दोन मोबाईल व अॅक्टीवा गाडी असा एकूण ४,५६,०००/- रक्कमेचा मुद्देमाल हस्तगत करणेत आलेला आहे.
सदरची कामगिरी मा. धनंजय कुलकर्णी, पोलीस अधीक्षक रत्नागिरी, श्रीमती जयश्री गायकवाड, अपर पोलीस अधीक्षक रत्नागिरी, मा. निलेश माईनकर, उपविभागीय पोलीस अधिकारी, रत्नागिरी यांचे आदेशाने अमित यादव, पोलीस निरीक्षक, संगमेश्वर पोलीस ठाणे यांचे मार्गदर्शनाखाली पोउनि/शंकर नागरगोजे, पोहेकॉ/१४३० कामेरकर, पोहेकॉ/१२७३ मनवल, पोकॉ/१३५६ मस्कर, पोकॉ/२७ खोंदल, तांत्रिक विश्लेषण कक्ष यांचेकडील अमंलदार पोहेकॉ/रनिज शेख, पोकों/निलेश शेलार यांनी केली आहे.
